Rusiye Federatsiyasınıñ Devlet duması blok etilgen saytlarğa kirmek ve «ekstremist malümatnı» qıdırmaq içün programmalardan faydalanğanlar içün para cezası aqqında deñişmeler qabul etti.
Qanun Memuriy uquq bozuvları kodeksine eki yañı maddeni kirsete – 13.52 ve 13.53. Memuriy uquq bozuvları kodeksiniñ 13.52 maddesi Rusiyede VPN qullanıluvı içün mesüliyetni belgilemekte. Böylece, şahıslar içün 50 biñden 200 biñ rublege qadar, vekâletli şahıslar içün 80 biñden 300 biñ rublege qadar ve şirketler içün 200 biñden bir million rublege qadar para cezalarınıñ berilüvini belgiley.
13.53 maddesi maddesi «ekstremist malümatnı qıdıruv ve olarğa erişüv içün, şu cümleden erişüvi sıñırlanğan informatsion resurs, informatsion-telekommunikatsion ağlarğa erişüvniñ programma-apparat vastalarınıñ qullanuvınen» mesüliyetni kirsete. Bu maddege istinaden para cezaları şahıslar içün 3 biñden 5 biñ rublege qadar olacaq. Daa evel Rusiye qanunlarında blok etilgen köntent qullanuvı içün mesüliyet yoq edi.
Böyle bozuvlarnı tapmaq çiyun qıdıruv ikâyesini baqmaq mümkün – ya Google akkauntında, ya da alınğan cihaznıñ brauzerinde. Bundan ğayrı, qullanıcılar arasında bozucılarnı operatorlar qıdırmağa yardım ete bile.
«Setevıye svobodı» hatırlatalar, Rusiye qıdıruv sistemaları ve içtimaiy ağlar uquq qoruyıcı organlarınen işbirligi yapmağa mecbur, qullanıcılarnıñ qıdıruv statistikasını toplay ve bere. Bundan ğayrı, yañı qanunlar soqaqta polis tarafından daa sıq «cihaz teşkerüvi» içün sebep ola bile.
Evelden kirsetilgen ve areketsiz olğan qanun leyhalarınıñ «ayneci» taktikası repressiv teşebbüsler içün çoq qullanılğan edi. O, ekinci ve üçünci oquvğa bir künde çıqmağa imkân bergen qabul etüv esnasını tezleştire. Bu cemaat rezonansına da yol bermemege yardım ete», – dep qayd ete «Setevıye svobodı». Tüzetüvler 2025 senesi sentâbrniñ 1-nde işke tüşürilecek.