Rusiye mahkemesi tarafından mahküm etilgen «qırımlı musulmanlar davasınıñ» mabüsi Amethan Abdulvapov Rusiyeniñ İrkutsk vilâyetiniñ Angarsk şeerindeki №2 koloniyada insult keçirdi. Bu aqta qırımlınıñ babası Necip Abdulvapov «Qırım birdemligi»cemaat birleşmesina haber etti.
Onıñ aytqanına köre, Amethannıñ «yürek şikâyetleri» yoq edi. Qırımlı bu yıl iyün ayında tranzitnen bulunğan İrkutsk SİZO-1den qorantasına adiy mektüp yolladı.
Bir afta evelsi onı Angarsktaki İK-2 avuştırğanlarında kelgeninen tuvğanlarına mektüp yolladı, «ayaqta insult keçirgenini» ayttı. Abdulvapovnıñ ailesi metinni iyulniñ 15-nde aldı.
«Aynı şu koloniyada, anda kelgende, bu [insult] oldı. Anda bir şeyler olğandır – turğan yerde nasıl olur», – dep tahmin etti Necip Abdulvapov.
Onıñ qayd etkenine köre, oğluna ekim çağırılmadı. Qırımlı mektübinde tuvğanları yollaycaq ilâclarnı yazdı.
Abdulvapov soy-soplarından avdokat kelmesini rica etti. Qorantası advokatnıñ ziyaretinen bağlı ricası Abdulvapovnıñ insult sebeplerinen bağlı ola bile, dep tüşüne.
«O, yaramay. Boş yerde [ilâc, advokat aqqında] yazmaycağını bilem. Evelden ne qadar zor olsa da, er şey yahşı, dep yazğan edi. Ciddiy bir şey bar, demek», – dep qoştı qırımlınıñ babası.
Amethan Abdulvapov 2022 senesi fevral ayında Rusiye tintüvlerinden soñ tutuldı. O vaqıt Qırımnıñ bir qaç rayonında Rusiye uquq qoruyıcıları dört insannı tutqan edi: Ansar Osmanov, Marlen Mustafayev, Ernest Seytosmanov ve Amethan Abdulvapov.
Tutulğanlar Rusiyede terrorist tanılğan, amma bir çoq memlekette milliy qanunlar seviyesinde sıñırsız çalışqan «Hizb ut-Tahrir» siyasiy firqasında iştirak etkeninde qabaatlandı.
2023 senesi martnıñ 15-nde Rusiye mahkemesi Abdulvapovnı 10 yıl ve 6 ayğa azatlıqtan marum etti.