İşğal etilgen Qırımda quvetçiler ukrayin tarafdarı olğan insanlarnı kütleviy sürette taqip ete. Bu, Qırımnıñ rusiyeli akimiyetiniñ qırımlılar Rusiye ve onıñ prezidenti Vladimir Putinge qol tutqanı aqqında beyanatları vaziyetinde ola. İlk yaz ayında qırımlı studentni Qırım Ukrayina olğanını aytqanı içün mahkeme ettiler. Bu, halq ögünde afu isteme olamadan siyrek bir vaqiadır. Qız afu soramaqnı red etken. Qırım.Aqiqatqa davanıñ tafsilâtları belli oldı .
Rusiyeniñ Ukrayinağa keñ kölemli basuvı başlanğan soñ, Qırım yarımadasında cenkke qarşı narazılıq aktsiyaları başlandı. Ukrayinağa qoltutuv aktsiyaları vaziyetinde şu cümleden, internette, Rusiye quvetçileri içtimaiy ağlarnıñ Qırım segmentinde "qanunsız" dercler içün nezaretni faalleştirdi.
Qırımda Qırım, Ukrayina, Rusiye ve cenk aqqında yazılğan er bir derc ya da paylaşuv içün zarar körmek mümkün, deyler aq qorçalayıcılar. İlk yaz ayında böyle bir adise Aqmescit rayonında qayd etildi.
Qırım aqqında laflar RF ordusını itibardan tüşürdi
Cenkke qot tutqan saifeler Rusiye quvetçileriniñ Aqmescit rayonınıñ Skvortsovo köyünde yaşağan Elnaz Çaruhovanı ziyaret etkeni aqqında bildire.
Aqmescit rayonınıñ Skvortsovo köyü
Qırım.Aqiqat bilgenine köre, qırımlı Vernadskiy adına KFU-nıñ uquq fakultetiniñ üçünci kurs studenti ola. Açıq malümatta qayd etile ki, bundan evel aynı malümatqa saip olğan student RF İç işler nazirliginiñ Qırımdaki organlarında oquv ameliyatını keçken edi.
Onı "VKontakte" içtimaiy ağında "Ukrayinağa qol tutuv ve neo-natsist şiarları"nen paylaşqanında qabaatladılar, dep bildirdi "Krımskiy SMERŞ" telegram kanalı. Bu kanal Rusiye mahsus hızmetlerine Ukrayina tarafdarı ve cenkke qarşı mevamı olğan qırımlılarnı taqip etmege yardım ete.
Rusiye quvetçileri Elnaz Çaruhovanıñ taqip etilüvi aqqında resmiy saytlarında haber etmey.
Qırım.Aqiqatnıñ malümatına köre, ne memuriy protokolda, ne de mahkemede "neonatsist şiarları" aqqında söz yürsetilmey. Qırımlığa qarşı 20.3.3 maddesine (Rusiye Federatsiyasınıñ Silâlı quvetleriniñ itibardan tüşürüv) istinaden memuriy protokol tizildi.
Rusiye kontrolindeki Aqmescitniñ Kiyev rayon mahkemesiniñ malümatına köre, quvetçiler "Nezaret" tedbirinde qırımlı qıznıñ ⁇ "Vkontakte" içtimaiy ağında "Qırım Ukrayinadır. Ve buña iç kimse keder etmeycek" yazısı ile Ukrayina ve qırımtatar bayraqları olğan resimni yerleştirgenini tapqan.
Ukrayina Tış işler nazirliginiñ binasında qırımtatar ve ukrayin bayraqları
Mahkeme, bu foto "Rusiye Federatsiyasınıñ Silâlı quvetleriniñ qullanuvını itibardan tüşürmek maqsadınen yapılğan" degen hulâsa çıqarıp, itibardan tüşürmek "bir şeyge işançnı coymaq, itibarnı ve imicini bozmaq içün aselet yapılğan areketler" olğanını añlata.
Qırımnıñ Ukrayinağa aitligi aqqında laflar Rusiye ordusını nasıl etip "areketsizleştirgenini" mahkeme qararında aytılmay.
"Er dörtüncisi aşalavlarğa oğratıldı"
Mahkeme oturışında qız qabaatını tanıdı, dep aytıla mahkeme qararında. Elnaz Çaruhovanıñ özü bu dava boyunca mevamını açıq şekilde bildirmedi.
Mahkeme onı qabaatlı tanıp, 50 biñ ruble para cezasını berdi.
Rusiye kontrolindeki Aqmescitniñ Kiyev rayon mahkemesi
Bu dava, Rusiye quvetçileri tarafından "cenkke qarşı davalar"nıñ diger mabüslerine nisbeten yapılğan açıq-açıq afu soramasız keçti. Bu Qırımda pek siyrek rastkelgen bir vaqiadır.
"Elnaz afu soramağa razı olmadı", — dep aytıla "Krımskiy SMERŞ"niñ haberinde.
Rusiye quvetçileri tarafından tutulğan soñ halq ögünde afu sorama adeti yarımadada Rusiye Federatsiyasınıñ Ukrayinağa qarşı tam kölemli cenki vaqtında peyda oldı.
Z-saifelerinde insanlarnıñ Ukrayinağa qol tutqanları ya da cenkke qarşı çıqqanları içün Rusiye ordusından afu soravı videoları sıq-sıq peyda ola.
Olarnı öz isteginen yazalarmı-yoqmı belli degil. Ukrayina tarafdarı olğanları içün afu soramağa mecbur etilgen er dörtünci qırımlı "qoşma aşalavlarğa oğratıla", dep bildire Irade adlı Qırım aq qorçalayıcı teşebbüsi.
Cenkke qarşı aktsiya içün 15 yılğa mahküm etilgen Kezlevli ressam Bogdan Ziza, Qırım.Aqiqatqa, FSB hadimleri onı afu estemege zorlağanlarını, yazğanlarını bir qaç kere yañıdan aytmağa mecbur etkenlerini bildirgen edi.
"Cesaretiñiz içün teşekkürler"
Ukrayina tarafdarı mevamı içün taqipler, 2014 senesinden berli yarımadada Rusiye tarafından amelge keçirilgen "Ukrayinağa sadıqlıqnı bastırmaq içün sistemli siyasetniñ" neticesidir, dep bildire Ukrayina prezidentiniñ Qırım Muhtar Cumhuriyetindeki temsilciligi.
Qırım sakinleri milliy kimligini ifade etkeni, milliy timsallerni qullanğanı ve Rusiye işğalini açıqtan-açıq tenqit etkeni içün taqip etileler, dep qayd eteler müessisede.
Yaltada Vladimir Putinniñ graffitisi, arhiv fotoresimi
Buña baqmadan, qırımlılar "qıyın şaraitlerde ve daimiy telükede qarşılıq köstermekni toqtatmay, öz aqlarını qorçalay, işğal etilmegen topraqlarnen bağlarını saqlay, til, medeniyet ve vatandaşlıq menligini qoruy", dep bildire Temsilcilik.
Elnaz Çaruhovanıñ taqip etilmesini böyle bir tirenüvniñ örnegi olaraq adlandıralar.
"Er birine cesürligi ve açıq-aydın vatandaşlıq mevamı içün teşekkür etemiz. Qırım Ukrayinadır, ve Qırımnı tez vaqıtta azat etmek ve işğal altında yaşamağa mecbur olğan vatandaşlarımızğa telükesizlik duyğusını qaytarmaq içün beraber küreşemiz", — dep aytıla Temsilcilikniñ beyanatında.