İşğal etilgen Qırımda «Sarı şerit» areketiniñ yañı narazılıq aktsiyalarını keçirdi – tirenüv timsalleri birden bir qaç şeerde peyda oldı: Yalta, Aqmescit, Aqyar, Bağçasaray ve Kezlevde. Bu aqta areket Telegram kanalında haber ete.
«Onı er kes köre: yerli sakinler, satqınlar, Rusiye uquq qoruyıcıları. O, işğalcige evinde olmağanını hatırlata. O, rusiyelilerni qorquza ve kontrol isini boza. O, Ukrayina Silâlı quvetlerini beklegenlerge küç bere. O – olğanımıznıñ delilidir, biz barmız, çoqmız, yaqınmız», – dep bildire faaller.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
