Rusiyede gece dron ücümi aqqında bildirdiler, ava limanlarınıñ işi sıñırlanğan edi.
Moskva şeer yolbaşçısı Sergey Sobânin Rusiyeniñ paytahtı tarafına uçqan üç uçucısız yoq etildi, dep bildirdi. Aqibetleri aqqında haber etilmey.
Pulkovo ve Kaluga ava limanlarında çıqış ve keliş seferleri sıñırlanğan edi, şimdi tekrar başladı.
Rusiyeniñ Voronej vilâyetiniñ valisi Aleksandr Gusev bildirgenine köre, ava mudafaa quvetleri Voronej ve civarlarında eñ az beş uçucısıznı tapıp yoq etti. Onıñ malümatına köre, uçucısız parçaları Voronejde çoq qatlı evge tüşken soñ çağına yetmegen üç insan zarar kördi.
Rusiyeniñ Kaluga vilâyetiniñ valisi Vladislav Şapşa üç uçucısıznıñ yoq etilgenini bildirdi. Onıñ aytqanına köre, Suhiniç rayonında uçucısız eki qatlı evge darbe endirdi – yanğın yoq, cam parçaları 14 yaşında qıznı yaraladı. Şapşa diger zararlar aqqında haber etmey.
Vâçeslav Gladkov, Belgorod vilâyetiniñ valisi, dron ücümi neticesinde yaralanğanlar aqqında bildirdi. Tam sayısı belli degil, çünki o, keçken kününi aytıp, 17 yaralanğan aqqında bildirdi. Bundan evel eki elâk olğan ve yedi yaralanğan aqqında bildirdi.
Rusiye Mudafaa nazirligi Brânsk, Kursk, Orel, Smolenks, Voronej, Belgorod, Moskva, Kaluga, Leningrad, Lipetsk, Tulı vilâyetleri ve işğal etilgen Qırımda 122 dronnıñ yoq etilgeni aqqında bildirdi.
Qırım.Aqiqat bu malümatnı mustaqil şekilde tasdıqlap olamay.
Rusiyeniñ Ukrayinağa qarşı büyük istilâsı başlağan soñ Rusiye regionları ve Rusiye işğal etkne topraqlar muntazam sürette ateş ve uçucısızlarnıñ ücümlerine oğray.
Ukrayina tarafı istilâcınıñ ücüm küçüni eksiltmek içün Rusiye ordu bazalarını zayıflatuv işini keçire, dep qayd ete.
