2025 senesiniñ ilk yarısında işğal etilgen Qırımda 23 tintüv qayd etildi, 12-si tamır qırımtatar halqınıñ vekilleri evlerinde oldı. Bu aqta Qırımtatar resurs merkezi (QRM) bildire.
2024 senesi aynı müddet içinde 51 tintüv qayd etilgen edi, 34-ü qırımtatarlarnıñ evlerinde oldı, 2023 senesi 37 tintüv keçirilgen, 29-ı qırımtatarlarğa qarşı yapılğan edi.
Qayd etilgenine köre, tintüvlerniñ sayısı biraz eksilse de, siyasiy ve diniy sebeplerden taqipler yarımada işğali başlağanından berli devam ete.
«Uquq qoruyıcılar tintüv keçirgende zarar körgenlerniñ aqları sıq-sıq bozula. Hususan evlerge kirgenlerinde mulk zarar köre, saipleri olmağanda tintüv keçirile ya da yasaqlanğan edebiyat gizliden qoyula», – dep aytıla haberde.
Avropa insan aqları mahkemesi Rusiyeni söz serbestligini muntazam sürette bastırğanında ve Ukrayinağa qarşı cenkni tenqit etüv içün taqiplerde qabaatladı. Avropa mahkemesi Qırımda Rusiye mahkemeleriniñ bütün «ükümleri» qanunsız ola, dep qayd etti.
